Komisaun Simu Malu, Lia Los no Rekonsiliasaun (CAVR, tuir akronimu iha lia fuan português) - harii iha 2001 to´o nia disolusaun iha fulan Desembru tinan 2005 nudar instituisaun ho estatuto independente nebe komisarius hitu mak dirige. Regulamentu 10/2001 hasai insitituisaun ne´e hodi buka lia los konaba periodu 1974-1999, fasilita rekonsiliasaun komunitaria ba crimes nebe la dun todan, halo relatoriu konaba CAVR nia serbisu no halo rekomendasaun. Tuir ramata iha fulan Outubro tinan 2005, relatoriu Chega! ho tahan 2800 hato´o kedas ba Presidente, Parlamentu no Governu Timor-Leste.
Secretariado Tecnico Pos-CAVR
Tuir CAVR hetan disolusaun iha tinan 2005, Presidente Xanana Gusmão harii Sekretariadu pos-CAVR ho nia objectivu atu kompleta CAVR nia projectus balun nebe seidauk ramata.
Hanesan CAVR, Sekretariadu halao nafatin nia serbisu iha prisaun istoriku iha Díli laran ho objectivus haat: (a) halo diseminasaun ba Relatoriu CAVR ho produtus seluk tan; (b) kompleta programa edisaun CAVR, (b) haree ba arkivus CAVR nian no (d) mantein nafatin patrimoniu iha Komarka. Sekretariadu la iha mandatu atu halo peskisa ka rekonsiliasaun.
Noticias Badak
Presidente Ramos Horta fo apoio ba Pós-CAVR
Iha reuniaun ida ne´ebé realiza iha 10 Agostu 2007 ho representante sira husi Secretariado Tekniku Pos-CAVR, Presidente foun Timor-Leste nian fo nia apoio maka´as ba Sekretariadu nia mandatu no mos fo sujestaun atu Sekretariadu bele kontinua nafatin iha tinan 2008 ka to´o Parlamento no Governo hatan ba CAVR nia Relatóriu.
Presidente mos fo nia apoio ba proposta tuir ne´ebé ex-Comarka Balide ne´ebé reabilita ona ho fundus husi Japaun no sai hanesan CAVR nia eskritoriu nasional bele sai hanesan memorial nasional ba vitima sira no mos ba direitus umanus, tuir Relatoriu CAVR nia rekomendasaun.
Presidente Ramos Horta ho Agustinho de Vasconselos, DE Pós- CAVR nian
Primeiro-Ministro foun koalia kona-ba Chega!
Wainhira hato´o nia juramentu iha 8 Agostu 2007 no mos iha audiensia ho membro Parlamento no Korpo Diplomatiku sira ne´ebé hasoru iha Palasio Lahane, Primeiro-Ministro Xanana Gusmão dehan katak CAVR nia Relatoriu Chega! importante duni ba Timor-Leste nia futuru.
Primeiro-Ministro dehan katak
"... Relatoriu CAVR nian kona-ba esperiensia koletivu ne´ebé ita moris durante tinan ruanulu resin lima tenke hetan duni konsiderasaun husi ema hotu. Esperiensia ida ne´e ajuda ita hotu konprende ita nian historia uluk no mos ajuda ita koñese-an diak liu tan. Tamba razaun hirak ne´e ita labele haluhan lisaun tempo uluk nian at lori ita komprende krize foin lais ne´e no mos oin sa ita bele proteje ita nia futuru."
Subsidiu husi Banco Mundial
Sekretariado Tékniku Pos-CAVR organizasaun ida iha Timor-Leste nia laran ne´ebé, hanesan mos organizasaun seluk tan, hetan foin lalais husi Banko Mundial, ho AUSAID nia apoio, subsidiu ne´e tuir Banko nia programa rasik kona-ba Lideransa ho Komunikasaun ba Revitalizasaun Nasional.
Sekretariadu hetan subsidiu $49,483 hodi halao sosializasaun Relatoriu Chega! iha sosiedade sivil Timor-Leste nian. Presiza halao projektu sosializasaun ne´e iha fulan neen nia laran, to´o Dezembru 2007.
Halo Sosializasaun ba Chega!
Sekretariadu Pos-CAVR konstitui ona ekipa tolu ho finalidade atu haklekar CAVR nia Relatoriu iha sosiedade sivil nia laran ho organizasaun relijioso sira ne´ebé hola fatin iha Timor-Leste.
Jaimito da Costa mak koordena programa ida ne´e atu halo preparasaun no mobilizasaun husi organizasaun sira ne´ebé hamosu hanesan ajentes ba Chega! iha sira nia komunidades nia laran no mos atu fó sira nia kontribuisaun hodi lori ba oin Relatoriu nia objetivu nasional, hodi harii cultura não-violensia, direitus umanus no responsabilidade iha Timor-Leste.
Programa Radio
Atu ajuda halo sosializasaun ba CAVR nia Relatoriu, iha fulan Jullu liu ba, Sekretariadu Pos-CAVR hahu programa semanal iha radio. Ho naran Chega! Dalan Ba Dame, programa ne´e sai ho lia fuan tetun, iha tuku hitu dader, sabadu, iha Radio Timor-Leste. Programa ne´e haklekar ba estasaun radio komunidade sira iha distritu balun no sei rona to´o fulan Dezembru.
Promosaun Chega! iha Alemaña
Konsultor Senior husi Pos-CAVR, Pat Walsh, visita Alemaña iha fulan Juñu no Jullu nia laran atu promove CAVR nia Relatoriu no asiste konferensia internasional ida kona-ba Dame ho Justisa ne´ebé halo iha Nuremberga, 25 to´o 27 Juñu.
Bainhira hetan bolsa husi Friedrich Ebert Stiftung mak nia bele halo visita ne´e. Pat Walsh aproveita visita atu buka fundus, koalia iha palestra kona-ba CAVR, buka hetan dokumentasaun no hasoru organizasaun iha Indonesia, inklui mos organizasaun indonesio Aliansi Sosialisasi Chega!. Nia mos asiste CVA nia 4ª audiensia publiku iha Bali, iha loron 23 no 24 Jullu.
Eleisaun iha Timor-Leste ho Chega!
Iha tempo eleisaun ba Presidensia ho Parlamento Nasional ne´ebé realiza foin daudaun, ami halao inisiativa balun atu fo hanoin ba kandidatu sira katak Chega! seidauk hetan debate iha Parlamento no mos seidauk hetan ezekusaun husi Governo. Inisiativa inklui mos reuniaun kona-ba Chega! ho jornalista sira, ONG no mos halao seminariu ida ho kandidatu sira iha CAVR nia fatin.
Ami fo hatene ba kandidatu sira katak ami halo disseminasaun boot ba Chega! iha Timor nia laran no mos kona-ba sa ida mak komunidade sira hein katak Parlamento foun sei halo kona-ba Relatoriu ida ne´e. Kandidatu FRETILIN, CNRT ho PUN konkorda katak sira sei halo Chega! sai prioridade ida se karik sira sai eleitu.
Parlamentar inglesa halo visita ba Pos-CAVR
Ann Clwyd, deputada no presidente Grupu husi Partidos Tomak iha Parlamento ba Direitus Humanus iha Reino Unido, halo visita ba Secretariado Pos-CAVR iha loron 26 Abril liu ba atu hetan informasaun konaba diseminasaun Relatorio CAVR no mos atu fo sai nia hanoin iha Parlamento Timor-Leste.
Treinamentu ba jornalistas konaba construsaun dame
Friedrich Ebert Stiftung halao cursu treinamentu ida iha Bali, nebe hahu loron 8 to´o 14 Abril 2007, konaba assuntu "Entendimento Conflitos no Construsaun Dame tuir Conflito nian Transformasaun Sistemática".
Cursu nee hanorin oin sa bele aprofunda no comprende conflitos no oin sa jornalistas sira bele influensia opiniaun publica wainhira sira fo sai ideias foun atu resolve conflito.
Câncio Ximenes Soares husi Secretariado Pos-CAVR hola fatin iha grupu jornalistas sira nebe hetan treinamentu husi Aceh, Jacarta, Sulavesi, Timor-Leste ho Papua.
Organizasaun Feto Indonésia fo sai lian fuan husi Chega!
Comissaun Nacional Indonesia ba Violensia contra Feto (Komnas Perempuan) sei publica iha tempo badak capítulo ida husi Chega! konaba violensia seksual atu hatudu lia los, fo hatene revelasaun husi CAVR no halo recomendasaun ba Governo Indonésio no ba sosiedade tomak. Kontinua...
|
|
|
